Ирина Эланс

Автор который поможет с любыми образовательными и учебными заданиями

Творчество И.А.Калинкина

Икельце валось

Иван Алексеевич Калинкин чачсь Ульяновской областень Чей велесэ. Эйкакшпингезэ ды мазый иензэ жо ютасть Покш Игнатовань районсо. Сынст семиянть ветизь тозонь войнань стакачитне. Ламо майсемат печтясть, зярс эзть пачкоде Семёновканть видьс (ней те велинесь масторлангсонть нардавсь, прок арасельгак). Пачкодсть ды кадовсть эйзэнзэ ламо иес. Пингензэ перть а стувтови Иван Алексеевичнэнь се лембесь, конасонть эждизь тесэнь ломантне. Модас сюкони тенст сень кисэ эсензэ пельдеяк, аванзо пельдеяк весе эсь творчестванзо пачк. Неть: Лукерья Кузминична Зубова – се авась, кие саекшнызе эстензэ эрямо, Николай Иванович Ильин ды Семен Андреевич Бершин тонавтыцянзо, Сергей Филиппович Наумов, «8-е Марта» колхозонь прявтось, кие кучокшнызе цёранть Орданьбуев культпросветшколав тонавтнеме, мейле аравтокшнызе Ташто Чамзань велень клубонь прявтокс, ды ламо-ламо лият, кинь эйс токакшнось эрямо кизэ.

Горьковской высшей партийной школанть прядомадо мейле сон важодсь райгазетань редакторокс, «Эрзянь правда» газетань отделэнь заведующейкс, «Сятко» журналонь главной редакторокс.

Роботась МАССР-нь Писателень союзонь правлениянь председателекс.

И.А. Калинкин эрзянь поэзияс совась 50-це иетнестэ ды иеде иес яла келейгавтсь ды домкалгавтсь эсь творчествань мастерстванзо.

Весемезэ И.А. Калинкин сёрмадсь кемгавтово стихень ды поэмань книгат, конатнень эйстэ кототне ютавтозельть рузонь кельс. Сонсь Иван Алексеевич поэзиянь паро книгакс лови «Зорянь мизолкст» (1969) стихень сборникензэ. Тезэнь совить поэтэнть сехте вадря произведениянзо. Ёвтазь сборниктенть башка эрзянь кельсэ лиссть истят книгат: «Маней пиземе» (1972), «Сырнень сюлмо» (1974), «Кизэнь менель» (1975), «Лёмзёркс чире» (1977), «Витькстамо» (1981) ды рузонь кельсэ: «Отцовский характер» (1979), «Зеленые костры» (1983), «Черёмуховый берег» лиссь Московсо, 1983), «Песни с берегов Мокши и Суры» коллективной сборникесь (1988). 1985 иестэ эрзямокшонь книжной издательствасо лиссь «Пиче вирь» поэмань сборникезэ.

И. Калинкин, эсь прядонзо ёвтнезь, невти весе поколениянзо. Ды эзь кельме седеезэ стакачитнеде, сон кенярды весе паронтень, бажи редямс вадрянть. А бути лиси мезеяк берянь, машты онкстамо сонзэ кода философ: «Эрси…»

Г.И. Горбунов литературоведэсь эсь важодевкссэнзэ «И.А. Калинкин» тешкстась: «Касома ки лангсо покш нежекс И. Калинкиннэнь ульнесь минек эрзянь-мокшонь весе поэзиясь ды рузонь литературань ине художественной таштавксось».¹ Минек ине поэтэнтень сон алтась ламо стихть. Сёрмадсь А.Д. Куторкинэнь «Эрьмезь» книгадонзо. «Пришвинэнь сэдпезэ», «Островскоень усадьбасо» ды лия стихтне кармавтыть ледстямс Н.И. Ильин тонавтыцянзо, кона мерсь тензэ: сы шка ды тонсеть стихтнеяк кармить тонавтомо ломанть.

И. Калинкинэнь творчествасо пек ламо тарка саи гражданской лирикась, ды лиясто, паряк, сон явияк поэтэнть ловныцянть эйстэ. Аволь эрьванень удалакшны сёрмадомс А.С. Пушкинэнь «Памятникенть» кондямо, секс эсь гражданской вановтонть ёвтамсто патетикась эрси а кемевиксэкс, косо-косо лисни васень таркас, ды сонзэ кисэ аволь чуросто стакалгавтови стихень формаськак. Стихесь ламо ёмавты, бути а юты седейга, сёрмадозь кодамояк датантень эли тешкстазь-ёвтазь теманть коряс. Тень кувалма ледстяви «Кемема» стихотворениясь. Поэтэсь корты минек пайстомо шкадонть, ды ялатеке тесэяк маряви сонзэ обуцясь: кемемс вандынь чинтень. Те кемемась ёрокчинть марто вейсэ лездыть цидярдомс весе даволтнэнь.

Ды улить И. Калинкинэнь поэзиясо истят тешкст, конат минек вейкеяк поэтэнть арасть. Неть, васняяк, сонзэ сонеттнэ, сонетэнь каштазтнэ. Алкуксонь вечкемавтомо, седейстэ молиця лембевтеме тень а сёрмадсак. Ловнат эйсэст ды марясак, кода чави поэтэнть седеезэ. Истятнэнь ютксо, теде башка, авантень алтазь весе стихотворениятнеяк: «Янксема», «Стака кевкстема»… Стака кевкстемась – «тетят ули?» Войнань шкане те пачтясь сельведьс – тетятне маштовсть войнас. Течи кевкстемась пани эйкакшонть визьксчамас: тетяст кадынзе, ушодсь симеме. Тедеяк сёрмады поэтэсь, ды, нама, покш сеедйризкс марто.

Пертьпельксэнтень ломанень ёнкстнэнь максомась малавгавты тенек тарьксэв сёксенть, кармавты неемс аволь ансяк рудазонзо-тарьксэнзэ. Сон панжи тенек сепозь ёжомарямотнень: тундось – кеняркс, од шка, сёксесь – сыредема ёнов шаштома, весементь эсь таркава путнема-ладсема ёвтазь домка смусть мезентькак а явомадо. Минь весе – ломанеськак, менелеськак, сёксеськак – вейсэнь пелькст. Ансяк аволь свал марятано ды редятано тень. Иетне, сыредемась максыть ломанентень ламо чарькодьксчить, конат те шкас прок сепозельть эйстэнек. Самай истямо лувсо неявить-марявить поэтэнть меельце шкань ламо стихензэ.

Свалшкань толось лымбакстни састо,

Монень неяви, сон кандовсь

Ошонть куншкас войнань паксясто,

Козонь чавозь тетям кадовсь.²

Тесэ ледстяма ды таго мелявкс-ризкс апак топавто учоманть кувалма – тетянь апак маря вечкеманть кисэ. Истя жо И.А. Калинкинэнь твочрествасо содавикс тарка саить очерктне, ламотне конатнень эйстэ алтазь Великой Отечественной войнань геройтненень. Истя Иван Алексеевич путсь памятник тиринь модань ванстыцятненень, сетнень туртов, конат путызь пряст течинь минек маней эрямонок кисэ.

И.А. Калинкинэнь очерктнень тематикаст ды проблематикаст

И.А. Калинкин ламо сёрмадсь войнадо. Ды лиякс а кода. Те кажось вишка пингстэ совась сонзэ ойментень. Сонензэ топодекшнэсть ансяк кавксо иеть, зярдо тетязо чавовкшнось немецтнень каршо тюремстэ.

Арась, эзь велявто Алексей Степанович раськень ломаненстэнь. Сон эрямонзо максызе эсензэ масторонзо, нинзэ, эйкакшонзо кис. Уш сестэ Иван Калинкин арсесь поладомс тетянзо апак тее тевтнень: зярдояк а стувтнемс Покш Игнатовань ёнксонь ломантнень, конат эрямонь апак жаля тюрсть немецтнень каршо. Сындест сон сёрмадсь поэмат, очеркть, конатне лиснесть башка книгасо.

Тестэ ятонть каршо тюреме тукшность 4701 ломань, ютксост ульнесть 70 тейтерь-ават. Эйстэст 2645-тне чавовсть тюремань паксятнень лангс. 1200 ломантне казезельть орденсэ ды медальсэ.

Покш Игнатовань ёнксонь кото цёратне теевсть Советской Союзонь Героекс. Неть – А.В. Асманов, П.М. Куманев, В.Н. Бахарев, П.В. Еделев, Ф.Г. Шунеев, Г.Я. Ямушев, Ф.Р. Спиридонов весе славань ордентнэнь кавалерэсь.

Ней тесэ а стувтнить фронтовиктнень. Покш Игнатовасо панжозь аллея, косо аштить кото геройтнень бюстост. Сынст лемест кандтнить велень ульцятне. Райцентрасо панжозь Боевой Славань музей, косо покш тарка явозь войнань шкантень. Истят музейть улить лия велень школатнесэяк. Весе те пек кенярдовты И.А. Калинкинэнь. 2003-це иестэ лиссь сонзэ «Верность Родине» книгазо, косо седейшкава ёвтни Советской Союзонь Геройтнеде, Славань орденэнь колмо степенень кавалердэнть.

Книгась ушодови В.И. Горячевень, Покш Игнатовань ёнксонь прявтонть, «Дорогами испытаний» икельце валсонзо, косо ёвтни седейшкавань сюкпря И.А. Калинкиннэнь те книганть сёрмадоманзо кисэ.

Иван Алексеевичень «Всегда с нами» («Сон свал мартонок») очеркезэ алтазь А.В. Асмановнень, Советской Союзонь Героентень. Чачсь сон Чамза велесэ. Тосо ютась эйкакшпингезэ, Кавлейка лейнесэ экшелясь, кундсесь калт, чийнесь луга ланга. Покш читнестэ Асмановтнень кудосо ульнесть ламо инжеть.

Вейке кизэнь чопода вестэ Сашань тетязо саизе семиянзо велестэ ды тусть Московской областень Солнечногорской райононь Юрлово велев. Ансяк мейле цёрась кармась содамо, келя, тетязо сюпаволь, кедьстэст саиксылизь ули-парост: кудост, ракшаст, сюрост.

Од таркасояк эзизе нолда кедензэ стакачиденть Владимир Петрович. Сон вачкась кудо, рамась скал, реветь, саразт. Таго уцяскав эрямось совась кудозост. Саша кармась якамо школав. Ансяк, вана, войнась сезинзе эрзянь цёранть мельтнень-арсематнень.

И.А. Калинкин эсь очерксэнзэ келейстэ панжи А.В. Асмановонь кеме обуцянть. Сон зениткасонзо пултась, правтсь ламо ятонь самолетт. Седеяк псить тюрематне кармасть улеме Днепранть кис. 1943-це иень сексня А.В. Асманов чавовсь.

Очеркень сёрмадыцясь толкови, келя, Александр Владимировичень калмось куватьс эзь муеве раськень ломантненень. Ансяк 1963-це иень сёксня Асмановтненень кандсть покш сёрма. Цёранть авазо сорныця кедтнесэ панжизе конвертэнть ды кармась ловномо: «Вечкевикс Анастасия Егоровна… Тонь цёрат Асманов Александр Владимирович сержантось Советэнь Масторонть кисэ бойтнесэ чавовсь кода пелемань а содыця ломань. Покш оляксчинть кисэ, конань невтизе сон ятнэнь каршо тюремстэ, СССР-нь Верховной Советэнь Президиумось 1943 иень декабрянь 24-це чинь Указсонзо макссь тензэ Советской Союзонь лем».³ Правительственной сёрманть алов кедьчелькензэ путызе Л. Брежнев.

Седе тов И.А. Калинкин ёвтни, кода те кулясь стявтынзе пильге лангс Москов ало Юрлово веленть ды Покш Игнатованть. Муизь таркантькак, козонь калмизь алкуксонь героенть. Те – Ходорово Украинань велесь, – тешксты И.А. Калинкин.

Ловнат очеркень меельце валрисьметнень, косо невтеви кода Анастасия Егоровна лайши цёранзо калмонть лангсо, поцерсо лисить сельведтне… Алкукскак геройтне а кулсить.

«Сквозь всполони огня» («Толонь киява») очерксэнть ёвтневи В.Н. Бахаревде. Сон чачсь Аржадеева велесэ. Важодсь колхозсо. Зярдо ушодовсь войнась, тусь фронтов. 1943 иень октябрянь 7–8 читнестэ Василий Никифирович васенцекс пачкодсь Днепранть тона чирезэнзэ ды кармась леднеме немецтнень лангс. Сонзэ мельга уйсть лиятнеяк. Ятонть контратакась лепштязель. Тень кисэ В.Н. Бахаревнень максозель Советской Союзонь Героень лемесь.

1944-це иестэ Василий Никифорович стакасто ранязель ды сась кудов. Колоньгеменде ламо иеть сон ульнесь Аржадеевской велень Советэнь прявтокс. Остатка иетнестэ В.Н. Бахарев эрясь Саранскойсэ.

Тесэ ёвтневи И.А. Калинкинэнь очеркень героенть эрямодонзо. Зярдо жо ловнат кувалманзо сёрмадовксонть, весе сэрьсэ сти те ломанесь, сонзэ тевензэ, ялганзо, конатнень марто явсь цигарканзо, ярсамопелензэ.

Писателесь невти Бахаревень немецтнень каршо кежей тюрицякс. Теке марто – чевте седей ломанекс. Окопсо сеедьстэ морсесь эрзянь морот. Весе кунсолость сонзэ вайгелензэ. Зярдо тюремань паксясо теевиль а куш, а каш, В.Н. Бахарев ушодыль нинстэнь Мария Михайловнанень сёрмань сёрмадомо. Мейле таргинзе зепстэнзэ фотокарточканть ды куватьс вансь семиянзо лангс. Кемсь, сонзэ тевтнень поладсызь эйкакшонзо. Истя лисськак. Тень эйс кемевти писателесь И.А. Калинкин.

Днепранть трокс уеманть кис Советской Союзонь Героекс теевсь Чукалы велень эрзясь П.В. Еделев. Сон воевась. Центральной фронтонь сисемеце гвардейской кавалерийской корпуссо. Васняяк писателесь ёвтни, кода уш эйкакшпингстэ Петя кармась лишмень вечкеме. Мейле сонзэ аравтызь конюхокс. Ансяк вана уцяскав эрямонть сезизе войнась. Писателесь П.В. Еделькинэнь невти апелицякс. Зярдо эрявсть теемс плотт, эрзянь цёрась васенцекс ёвтызе мелензэ топавтомс те тевенть. Сынь нурька шкас кеме уськсэ сюлмсизь чочктнень, лангозост путсть пулеметт ды веть кармасть уеме Днепранть вить чирезэнзэ. Немецтне бомбасть апелицятнень, леднесть лангаст, ялатеке сынь пачкодсть тона ёнов ды чавсть ламо ятт.

Седе тов И.А. Калинкин ёвтни, кода П.В. Еделев сась отпусков, вастовсь нинзэ Ксения Степановна марто. Сонзэ учость Чукалы велень эрицятнеяк.

Кемень чить Героесь оймсесь тиринь велесэнзэ. Мейле таго фронтов. Цёрась изнизе куломанть. И.А. Калинкин ёвтни, кода Петр Васильевич стакасто ранявсь. Сонзэ одс тонавтызь якамо. Ней уш – палкине лангсо. Очерксэнть минь нетяно, кода фронтовикесь важоди велень Советэнь прявтокс. Ансяк чокшне ланга рунгозо кармась чулксетеме.

Арась ютксонок Героесь. Сондензэ ледстнематне кадовсть И.А. Калинкинэнь книгантень.

П.М. Куманевдо очеркенть лемезэ «Герой Днепра». Сондензэ ламо сёрмадозель «Эрзянь правда» газетасо, «Сяткосо». Писателесь И.А. Калинкин ёвтни Героенть эрямонь кинзэ парсте содазь. Эрьва валось ашти таркасонзо, аламонь аламонь панжи Советской Союзонь героенть П.М. Куманевонь тевензэ-валонзо. Иван Алексеевич, мерят, теке ютась сеть войнань качамонь китнева, уйсь Днепрань лакиця ведьга ды героензэ марто лиссь изницякс. Писателесь, теке эсь сельмсэнзэ, вансь, кода взводонь командирэсь, лейтенантось Куманев макснесь приказт. Сонсь маштсь комськавтово ятт, сайсь пулемет, омбоценть лангс ёртсь граната. Кирвазтизе.

Келя, Паша Куманев уцяскав теште ало чачсь. Паряк, алкукскак, истя. Бути сонзэ эрямонть аволизе сезе войнась. Геройтне а кулсить. Сынст оймест теевить каргокс ды ливтнить сэнь менельга. Нать алкукс истя.

А вана Советской Союзонь Геройденть Ф.Г. Шунеевде Иван Алексеевич сёрмадсь документальной повесть, кона саи книгасонть сехте покш тарка.

И.А. Калинкинэнь очеркензэ а молить вейке-вейкень ёнов. Секскак сынь шождасто ловновить. Вана кода ушодови П.Я. Ямушевде очеркезэ: «Се иень август ковсто Григорий Яковлевич сась варштамост эйкакшпингень таркатнень. Ютась паксятнева, лугань теине яннэтнева, сеть таркатнева, кува чийнесь кепе-штапо. Зярдо кассь покшсто, тия якась вечкевикс тейтерензэ марто…»

Мейле муизе се тарканть, косо ульнесь Пильно велинесь. Те семиясь сась Пикшень велестэ. Войнань шкасто сон окопсо ёвтнесь тиринь ёнксонь мазычиденть, сонзэ эрицятнеде. Сынст кисэ тюрсь эрямонь апак жаля. 1944-це иестэ Ямушев воевась омбоце Украинской фронтонь 108-це дивизиянь 305-це полксо. Дунай леенть вить ёно чирентень уемань кис сонензэ максозель Советской Союзонь Героень лемесь. Те шождасто мерезь. Тосо жо ульнесь ятонь покш вий. Немецтнеяк тюрсть кежейстэ. Содасть, бути минектне сайсызь те плацдарманть, сыненст сы пе. Ялатеке Г.Я. Ямушев ды сонзэ солдатнэ изнясть. Чавсть ламо немецть. Г.Я. Ямушев кулось 1978-це иестэ.

И.А. Калинкин «Звёзды Спиридонова» («Спиридоновонь тештензэ») очерксэнть келейстэ, домкасто панжи Славань орденэнь колмо геройксчить. Истят апелемань тевть тейнесь тюремань паксятнесэ сержантось-артиллеристэсь Филипп Романович Спиридонов. Кода ды кодат войнань кить-янт ютась эрзясь, теде сёрмады И.А. Калинкин.

Эрьва очеркенть песэ ули поэтэнть стихезэ. Сынь пек ладить сёрмадовкстнэнень. Те седеяк сюпалгавты, мазылгавты ёвтазенть.

«Поле жизни» («Эрямонь пакся») очеркесь алтазь Федор Герасимович Шунеевнень, Советской Союзонь Героентень. «Тиринь велезэ – Андреевкась». Сон алкуксонь героекс ютызе войнанть ды кеместэ важодсь мирной шкастонть. Тесэ сон чачсь-кассь, те тиринь таркиненть кисэ сон тюрсь седейтеме ятонть каршо.

Очеркесь ушодови седеень раздиця пертьпельксэнь невтемасо. «Икелест ульнесть куловсо вельтязь чаво таркатне, конатнесэ аволь умок мазылгалесть велеть. Кудотнень таркасо аштесть пельскалавтозь каштомот. // Куловонь ды толонь пандт, уроз ломанть, калмт».⁴ Ансяк те эзь куловт Родинань кисэ тюрицятнень, а мекевланг, макссь тенст од вийть, анокстась сынст изнямонь тюрицятненень.

Истямо ёжо марто эрясь неть акецявтыця читнестэ Федор Шунеев сержантось – противотанковой пушкань расчетонь командирэсь. Те потмоёжонь апарось лиссь чистэ чис. Шкась ютась. Ансяк тюрема таркасонть арась кодамояк икелепелев шаштома – боевой действият арась. Те седеяк апаркстомсь солдатнэнь. Сась апаро куля – чавовсть Пастухов браттнэ, те пек апаркстомтызе Шунеевень, ведь неть цёрынетне эрзянь ды фронтонь китнес-янтнэс сынь колмонест састь теке жо Андреевка велестэнть, кона ашти Мордовиянь Игнатовань районсо.

Стясь Шунеевень сельмензэ икелев тиринь велесь. Косо эрьва лопинесь, тарадкесь малавикс седеентень, эжди ойменть аёвтавикс лембесэ. Тесэ сон васенцеде седеень скирдавкс марто варштась Анна тейтеренть лангс. Нама, ульнесть апароткак. Превстэ а лиси се шкась, зярдо Андреевка велесь палсь, сядо комсь кудотнень таркас кадовкшность ансяк куловонь куцят. Сестэ самай сон теевсь малавиксэкс Семен ды Федор Пастуховонь браттнэнь марто. Эряви тешкстамс, Шунеевтнень семияст ульнесь аволь сюпав, ды те тувталонть кувалт Федянень савсь кадомс тиринь веленть, роботамс Ивановасо, Петрозаводскойсэ.

Шкась ютась. Тиринь велесэ сонзэ велявтоманзо важодемстэ учость аволь ансяк кастыцянзо, истя жо вечкевикс низэ Анна Алексеевна – се самай Аннась ды колмо цёранзо: Иван, Гриша, Федор.

Война… Явомат малавикс ломань марто. Кельбрясо вели мазый, седейстокиця вейке моро:

Вай, луга, луга,

Пижине луга,

Вай, луга, луга,

Мазыйне луга.

Бойть, сраженият… Одс ды одс. Немецтне мекс азаргадсть. Пейсэ ды кенжсэ раздить понгозь сынст кедьс ломантнень. Пачкодсть уш Литвантень. Вейке секундаскак а лисни Шунеевень превстэ тиринь таркинезэ, секе тев эсензэ арсемасонзо сон кандови вечкевикс ломанензэ ваксс. Ансяк эрьва шкасто кайсевиця леднематне сыргозтить сонзэ тантей удомастонть.

Красной Армиясь нолдызе немецень лапанзо алдо весе Белорусиянть, пачколесть сынст юронтень – Берлинэв. Самай тесэ, госпитальсэ, пачтясть сонензэ кецявтыця куля, сонензэ Федор Герасимович Шунеев сержантонтень Литвань Туменнки велиненть ало тюреманть кисэ максть покш лем – Советской Союзонь Герой.

И.А. Калинкин эсь очерксэнзэ пек домкасто панжи Ф.Г. Шунеевень тевень содыця, эсь Ролинань вечкиця обуцянзо. Эзть тандавто сонзэ зярдояк стакачитне. Войнадо мейле важодсь ток лангсо, ульнесь завфермакс, зоотехникекс.

Очерксэнть истя жо вадрясто невтеви: В.Г. Шунеевзярдояк эзь кандтне прянзо верьга. Эсензэ мештензэ лангсо арасельть зярдояк боевой ды мирной награданзо. Виздсь. Оймесэ сон свал ульнесь од, ансяк иетне сайсть эсест, – чувтось, сеяк шкань ютазь лазнови, памори, а мезть уш кортамс ломанде.

Тиринь модас сон мадсь 1972 иень панжиковонь 9-це чистэ. Се чистэнть, конань кисэ те покш ломанесь валсь зяро верь, кирдсь зяро ёмавкст!

«Спасатель жизни» (»Эрямонь идиця») очеркесь алтазь Петр Николаевич Капетин хирургонтень.

Очеркень лемесь ламо корты эсензэ героензэ кувалма. Алкукс, П.Н. Капетин ламонень идесь эрямот, казсь од вановт пертьпельксэнть лангс. Сонзэ туртов секе тев кучить паро валт идезь ломанензэ. Чачськак те ломанесь покш чистэ – Изнямонь чистэ.

Виде, шумбрачинь арсема сёрмат састь сонензэ эрьва косто, ансяк седе пек кецявтсть сетне, конатнень кучнось военкоматось.

Республикань военкомось а весть казнекшнызе сонзэ Почетной грамотасо. Сынст эйсэ свал ульнесь тешкстазь: «армияв служамо од ломантнень анокстамонь кисэ». Лембе валтнэ сыть ды сыть. Седей вакссо те покш ломанесь кирди «Красный Крест» ды «Знание» Россиянь ды Мордовиянь обществатнень наградаст, Большеигнатовань райононь депутатонь советэнь Почетной грамотаст.

Ды кода сынст а ванстомс? Сынь казезь ведь и лембенть кисэ, сеть заслугатнень кисэ, конатнень марто Петр Николаевич иди ломантнень эрямост.

Улить сонзэ истят знаконзо: орденэнь «Знак Почёта», медальть «За трудовое отличие», «За победу над Германией в Великой Отечественной войне 1941–1945 г.г.».

Сти кевкстема: косто те весе саевсь? Весе ушодкстнэ ветить вишкапингестэ. Эйкакшокс чийнемстэ, Капетинэнь ульнесь мелезэ, улемс лезэвекс ломантненень, весе народонтень, Родинантень. Чачсь сон Рав леенть чирес, Сызрань ошонтень. Семиясост ульнесть 9 эйкакшт. Школанзо Петя прядызе вадрясто. 1940 иестэ ушодсь тонавтнеме мед. институтсо, кона Саратовсо. Кудосто лезэ эзь учне, роботась сонсь.

Войнань стака иетнеяк эзть меша цёркантень прядомс тонавтнеманть, кадык ульнеськак пек стака.

1944 иень кизэнь васенце ковстонть Петр Капетиннэнь макссть диплом врач-лечебник специальностень коряс. Важодема таркась ёвтазель – Покш Игнатова. Лецямо кудось ульнесь пек берянь состояниясо. Мезеяк эзь сатно. Ансяк сэредицятне эзть маштне, ардсть сынь мик лия республикастояк.

Ютко шказо арасель. Эзь стувтне сон сэредицянзо, эрьватанень яксесь кудос.

Теде башка, Капетин важодсь райононь одломантнень марто, конат анокстасть молеме Родинань ванстомо. Сынст шумбрачист сон пек ванстсь.

Истят ломантнеде, конат седеень путозь важодить ломань марто, алтыть сынст туртов весе эрямост, аламо, секскак сынст эряви ванстомс, а стувтнемс. Самай тень тееме кармавты минек И.А. Калинкин.

Эряви тешкстамс, И.А. Калинкин эсь очеркензэ алтынзе аволь ансяк Ине Отечественной войнань геройтнень туртов, сонзэ кедензэ алдо лиссть виев сермадовкст, конатнень эйсэ сон ёвтни малавикс ломантнеде.

Истя, Мордовиянь книгань издательствасо 2003-це иестэ лиссть И.А. Калинкинэнь лирикань ды прозань зярыя книганзо. Васенцентень стихтнеде башка совасть «Кискань эрямо» повестесь ды «Уцяска» (Мария Павловна Зайкинадо) очеркесь, алтазь сон авантень, кона те шкас эри тосо, косо ютась поэтэнть эйкакшчизэ ды тундозо.

Авторось пек вадрясто невтизе аванть эрямонзо «Чачсь 1919 иестэ Отяжвелесэ. Эрямозо мольсь а вейкетьстэ. Вастневсть пароськак, берянеськак. Тиринь таркасто «стака уцяскань калгодо машинась вачкодсь Суковтнень пизэст ланга».⁵ Нельгизь весе парочист, эсест панизь. «Лишметне лиссть Отяжвелестэнть. Эйсэст ласте ильтясть милициятне. Окойники пачкодсть Покш Игнатовав».⁶ Мейле ускизь Карагандав. Перькаст ульнесь ансяк чаво тарка.

И. Калинкин маштсь невтеме сень, кода авась ушодсь апаронь нильнеме вишкапингестэ саезь.

1931-це иестэ, зярдо Маша тейтерькантень топодсть ансяк кемгавтово иеть, ильтизь сонзэ Ивановав. «Тосо, вейке семиясо, кармась эйкакшонь ваномо».⁷ Важодемадо эрзянь тейтересь прянзо эзь кайсе. Важодсь ды важодсь.

Войнань иетнестэ пачкодсь Семёновкав, косо и вастызе сыречинзэ. Тесэ мирденень лиссь, кармась улеме Зайкинакс. Тесэ трясть-кассть эйкакшт.

Вечки авась чачома моданзо, те толнэсь свал палы оймесэнзэ.

Эзь юта Иван Алексеевич сеть ломантнень вакска, конатнень тевест пек малавикст эстензэ – те минек ине сёрмадыцятне, ине поэттнэ. Эсензэ очеркензэ сон алтынзе Никул Эркайнень, Ю. Исланкиннэнь, Н. Киртайкинанень, А.Д. Куторкиннэнь, М. Безбородовнень.

Эряви тешкстамс, седе пек сон панжи неть ломантнень творчестваст, содавты ловныцятнень сеть асодавикс тешкскетнень марто, конат улить эрьванть творчествасо.

Истя, «Жойни сонзэ седей морозо» очеркесь алтазь Никул Эркаень чачома чистэ 85 иетненень.

Сёрмадовксось ушодови Калинкинэнь тиринь Семёновкань эрямодо ёвтнемасто, кизэнь чокшнетне, косо мазылгавтовсть Тимофеень жойневтиця балалайкасо ды эрзянь мазы моросо, конатне вечкевсть ламонень, ансяк кияк эзь сода сынст сёрмадыцяст. Ламо иень ютазь Калинкин муинзе неть моротнень Н. Эркаень сборникстэ «Стихть ды поэмат».

Чачсь теде мейле цёранть мештес бажамо: «неемс эрзя-мокшонь масторонь содавикс поэтэнть». Ды те вастомась лиссь. «Шумбра цёра ломань… Келей чама, сельмукшсо, конатнень экшстэ ваныть превень лембесэ эждиця сельмть. Сэрей конянть велькссэ – тустосто аштить аволь раужо, аволь ашо прячерть. Сынь валанясто судрязь удалов. Вана кодамо сон, эрзянь поэтэсь-цёковось!»⁸

Ловнат неть строчкатнень, ды сельметь икелев сти сонсь поэтэсь, те ине ломанесь, кона эсензэ стихензэ кувалт маштсь невтеме тиринь масторонть эрямонзо, сёрмадомс сонзэ весе мазычинзэ кувалма.

… Молян Пьяна леенть берекс,

Веденть чирес озан мон.

А неявикс гайтев нармунекс ливтить Никул Эркаень ойме валонзо менелентень ды туить сонзэ васолксс, моданть велькска».⁹

Кодат валт сёрмадсь Калинкин! Сонзэ очеркензэ ловномадо мейле мештесэ кирвази толнэ, кона кармавты вечкемс эсенек тиринь ломаненек, тиринь поэттнэнь, конатнень валост эрить жойниця моросо.

2. И.А. Калинкинэнь очерктнень поэтикаст

Содазь, эрьва жанранть эсензэ сёрмадома лувозо. Очерксэнть – те ломаненть вельде эрямонь смустень невтемась. Очеркесь а шожда жанра, сонзэ сёрмадомантень эряви шка. Панжови материалось, эрьва ёндо ванкшнови-тонавтневи эрямось ды мейле те ацави вейке коцтос, конасонть эрямосто а сеске неявикс тевесь саи покш тарка, максы тензэ эрявикс тюс.

Малав И.А. Калинкинэнь весе очеркензэ алтазь войнантень. Ды сынст явовтыця лувось – ёвтнемс сеть ине ломантнеде, «кить ванстызь-казизь масторонтень сэтьме валскетнень, сырнень розь паксятнень, павакс уиця лейтнень ды эрьгекс кевериця лейнетнень…»¹⁰

Эряви тешкстамс сеньгак, кодамо тарка саи публицистикань жанратнесэ шкань невтемась. Очерксэнть невтеви цела эрямо. И.А. Калинкинэнь сёрмадовкстнэсэ, конат совавтозь «Верность Родине» книгантень невти эсензэ героенть эрямонзо педе пес: эйкакшпингстэ саезь сыречис, нама, седе домкасто панжови сынст эрямост войнань шкастонть.

Ванномань кисэ сайсынек сонзэ очеркензэ «Толонь киява». Сон пек малавикс художественной ёвтнемантень. А стяко М. Горький сёрмадсь: «очеркесь ашти исследованиянть ды ёвтнеманть ютксо», тешкстась, буто очеркесь – те художественной произведения, ды сонзэ ули вейке явовтыця тешксэзэ те публицистичностесь.

Очерксэнть ловныцясь сеске совавтови тевентень: несынзе войнанть стакачитнень, марясынзе леднематнень, бомбань-снарядонь сезневематнень.

Эряви тешкстамс сеньгак, авторось вадрясто вети ёвтнема лувонть. Састо вети вейке ёвтнема шкастонть лиянтень. Секскак седе тов очеркесь поладови сеньсэ, кода войнанть прядовомадо мейле прявт героенть Василий Никифорович Бахаревень вастызь кудосо. Невтеви велень сэтьме эрямось, конань кисэ фронтовикесь «…эскелясь толонь киява, кивень пиземе алга, сонзэ кисэ кирдсь ятонь пулянь вачкодькст».¹¹